यसरी घरदैलोमा भोट माग्नका लागि पुग्ने उम्मेदवारहरुसँग मतदाताहरूले आफ्नो चासोका विषयहरू राख्दै आइरहेका छन् । पार्टीहरू सुशासन, स्थायित्व जस्ता कुराहरूको आश्वासन दिइरहँदा भने काठमाडौँको छिमेकी जिल्ला काभ्रेपलान्चोकका किसानहरूको माग भने बेग्लै छ ।“यसरी भनेको समयमा चुनाव हुन पर्छ । हामीले पनि भोट हाल्न पाउँछौँ र पर्छ ।

आफूले रुचाएको, काम गर्न सक्ने उम्मेदवार छान्नपर्छ तर यो पटकको चुनावको उम्मेदवारलाई भने हामी अरू होइन समयमै मल ल्याउने वातावरण बनाउन सक्छ वा सक्दैन भन्ने सोध्छौँ र त्यही अनुसार भोट हाल्छौँ ।” काभ्रेको पनौतीमा आलु खेती गर्दै आएकी सिता श्रेष्ठले रातोपाटीलाई भनिन् ।हरेक वर्ष खेती लगाउने समयमा मलको अभाव हुने र यसले उत्पादनमै पनि ह्रास आउँदा यहाँका किसान मारमा पर्ने गरेका छन् । ३ लाख २६ हजार ६ सय ११ योग्य मतदाता रहेको काभ्रेको प्रमुख आयस्रोत भनेकै खेती किसानी छ । तर पनि समयमै मल नपाउँदा भने किसान मारमा पर्ने गरेका छन् । यो समस्या अझ असार साउनमा धान लगाउने समयमा बढ्ने उनीहरूको गुनासो छ ।