हेटौंडा
बोधि श्रवण धर्म संघ, बारा, नेपालको आयोजनामा हेटौंडामा ५ दिने ‘२१औँ विश्वशान्ति महा मैत्री बोधि मार्ग दर्शन तथा मैत्री धर्म आध्यात्मिक अनुष्ठान–२०८२’ आयोजना हुने भएको छ।
हेटौंडा उपमहानगरपालिका–४ स्थित लोकतान्त्रिक (हुप्रा) चौरमा २०८२ साल चैत २६ गतेदेखि ३० गतेसम्म सञ्चालन हुने कार्यक्रममा नेपालका विभिन्न जिल्लाका साथै विदेशबाट समेत भक्तजन तथा मैत्री धर्मप्रति आस्था र सद्भाव राख्ने श्रद्धालुहरूको सहभागिता रहने आयोजकले जनाएको छ।
बोधि श्रवण धर्म संघका काठमाडौं जिल्ला सदस्य बिकेश लामाका अनुसार कार्यक्रम परम पूजनीय मैत्रीनाथज्यूको सत्संकल्पमा आयोजना गर्न लागिएको हो। अनुष्ठानमार्फत सह–अस्तित्व, सह–जीवन, सह–वास, सह–कार्य, शान्ति तथा करुणामा आधारित मैत्रीपूर्ण समाज र जगत निर्माणको सन्देश प्रवाह गरिने बताइएको छ।
आयोजकले कार्यक्रमलाई भव्य तथा सभ्य रूपमा सफल बनाउन नेपालभरका मैत्री धर्मप्रति आस्था, सद्भाव र रुचि राख्ने सम्पूर्ण भक्तजनलाई सहभागी भई पुण्य लाभ ग्रहण गर्न मैत्रीपूर्ण निमन्त्रणा गरेको छ।
‘हामी सबै सबैका लागि हौं’ भन्ने भावनाका साथ मैत्रीय जगत निर्माणमा सहभागी बनौं भन्ने सन्देशसहित आयोजित कार्यक्रमको सूचना देशभरका सञ्चारमाध्यममार्फत सम्प्रेषण गर्नसमेत आयोजकले आग्रह गरेको छ