चौतारा । प्रतिनिधिसभा सदस्य निर्वाचन २०८२ अन्तर्गत सिन्धुपाल्चोकका दुवै निर्वाचन क्षेत्रको अन्तिम मतपरिणाम सार्वजनिक भएको छ। क्षेत्र नं.१मा राष्ट्रिय स्वतन्त्र पार्टी (रास्वपा)का भरतप्रसाद पराजुली र क्षेत्र नं.२मा नेपाली कम्युनिष्ट पार्टीका युवराज दुलाल ‘शरद’ निर्वाचित भएका छन्।
क्षेत्र नं.१मा पराजुलीले २४ हजार ४१२ मत प्राप्त गर्दै नेपाली कम्युनिष्ट पार्टीका माधवप्रसाद सापकोटा ‘सुबोध’लाई ७ हजार ८५ मतको फराकिलो अन्तरले पराजित गरे। सापकोटाले १७ हजार ३२७ मत पाए।
यससँगै २०६४,२०७० र २०७४मा अग्निप्रसाद सापकोटा तथा २०७९ मा माधवप्रसाद सापकोटा निर्वाचित हुँदै आएको क्षेत्र नं.१मा सापकोटा परिवारको राजनीतिक विरासत र लामो समयदेखि कायम कम्युनिष्टको किल्लाको रुपमा परिचित निर्वाचन क्षेत्रमा ठूलो धक्का लागेको छ।क्षेत्र नं.१मा अन्य दलहरूको अन्तिम मतपरिणाम एमालेका सरेश नेपाल ११ हजार ९६१ मतसहित तेस्रो,कांग्रेसका जंगबहादुर लामा ११ हजार २९२ मतसहित चौथो र उज्यालो नेपाल पार्टीका प्रताप लामा २ हजार ४२१ मतसहित पाँचौँ भए।
यता क्षेत्र नं.२मा बागमती प्रदेशसभा सदस्यबाट राजीनामा दिएर प्रतिनिधिसभाको चुनावी मैदानमा उत्रिएका युवराज दुलाल‘शरद’ले २१ हजार ६९९ मतसहित निर्वाचित भएका छन। उनका निकटतम प्रतिस्पर्धी नेपाली कांग्रेसका बंशलाल तामाङले १९ हजार १४६ मत पाए। दुलालले २ हजार ५५३ मतको अन्तरमा जित निकाले।
क्षेत्र नं.२मा अन्य दलका अन्तिम परिणाम एमालेका शेरबहादुर तामाङ १५ हजार ९२६ मतसहित तेस्रो,रास्वपाका झलकबहादुर श्रेष्ठ १४ हजार १९ मतसहित चौथो, राप्रपाका उम्मेदवार १ हजार ६८१ मतसहित पाँचौँ र उज्यालो नेपाल पार्टीका प्रताप लामा १ हजार २३८ मतसहित छैटौँ स्थानमा रहे।
तपाईको प्रतिक्रिया